Diretór Nasionál Eskola Sekundáriu Tékniku Vokasionál husi Ministeriu Edukasaun Fernando M. Gama partisipa iha formasaun kona ba publikasaun konteúdu no utilizasaun plataforma online ne’ebé hanaran JORNÁL PAREDE DIJITÁL ne’ebé hala’o abertura husi Diretór Jerál SEKOMS Florindo da Costa iha salaun ETI Díli,Fomentu II, kuarta feira ne’e (27/08/2025)
Iha okajiaun ne’e Fernando agradese ba SEKOMS tamba inisia ona jornál parede dijitál ne’e hodi publika atividade eskola nian tanba ne’e, husu ba profesor sira ne’ebe partisipa iha formasaun ne’e bele aproveita ho diak nune’e bele hetan koñesimentu naton durante tempu formasaun.
“Agradese ba SEKOMS ita konsege halo ida ne’e, kooperasaun di’ak ho edukasaun ita sei halo buat di’ak ruma ba ita-nia eskola sira, ne’e duni ita agradese komesa agora ita komesa hateke dook ona, ida ne’e la’ós iha ne’e de’it sei ba to’o munisípiu sira, agora ita bele aproveita, ha’u sujere ba profesór sira ne’ebé hanorin kona-ba Téknika Informátika no Komunikasaun (TIK) aproveita halo didi’ak no aprende saida maka ita-nia maluk sira fó mai ita” tenik Diretór Fernando.
Diretór Fernando mos hateten kooperasaun diak entre SEKOMS ho Ministériu Edukasaun ho parseiru CHILD FUND sei halo buat di’ak ruma ba eskola sira.
Nia salienta katak formasaun ne’e la’os iha Dili de’it maibe sei to’o mos eskola sira iha Munisipiu, tan ne’e nia husu ba manorin nain sira ne’ebe hanorin kona-ba Téknika Informátika no Komunikasaun (TIK) aproveita halo didi’ak no aprende saida mak formador sira fo durante formasaun.
Formasaun ne’e hala’o durante loron tolu hahú dia 27 to’o 30 agostu 2025, enkuantu partisipa iha formasaun ne’e mai husi eskola públiku no privadu hamutuk ualu (8) kompostu hosi Eskola Katólika Santa Madalena de Canossa Díli, Colegio Santo Inâcio Loiola Kasait, ESG Annur Díli, ESTV-IT 28 Novembru, ESG 12 Novembru, ETI, ESG Nicolau Lobato, Colegio São José Operário, ho total partisipante nain ruanulu (20) husi feto nain 4 no mane nain 16.
Jornalista : Ekipa Formando – Jornal Parede Dijital
Editor : Formador – JPD – SEKOMS
